25
Aug
Анета Механджијска – (не)Случаен пирсинг Артист!
1. Ајде да ни се претставиш и кажи ни како се реши да се занимаваш со пирсање?
Моето име e Анета Механджијска и работам како пирсинг артист во Студиото за тетовирање и пирсинг СКИН АРТ во Скопје. Од секогаш знаев дека нема да имам нормална работа,женско сум,фасцинирана сум со светкави материјали-метали-украси уште од малечка, пирсањето како професија ми дојде како шлаг на торта. Го работам ова малку повеќе од 10 години и уживам во самата работа,поврзување со секакви луѓе и карактери е за мене друга димензија која пирсањето го прави поинтересно и поинтересно и поинтересно до бескрај!
Тоа е нешто за што сум многу страствена и не би сакала да правам нешто друго.
Сакам, не, обожавам да пирсам, затоа што ми се допаѓа како може пирсингот се да промени, изгледот, чувството , да се осознаеш и да се чувствуваш поубаво, е тоа е тоа што го сакам и што можам да го направам за другите. Да им ја покажам да им ги отворам очите кон оваа неверојатна убава индустрија која несекојдневно го украсува телото на уникатен начин.
Кога бев мала со моите кукли си играв како хирург, ги боцкав, ги украсував со секакви светлуцави материјалчиња и објекти ги дисекцирав и ги лечев – моите гледаа лекар или хирург во мене ама ја сепак знаев дека сум уметничка душа.
Израснав во навистина мал град, така што никој не беше испирсан (bodimodificiran), но јас секогаш ги барав сликите на пирсинг и тетоважи и ги гледав луѓето со убави тетоважи и пирсеви по телото и со проширени канали (тунели) на ушите и ги гледав со стравопочит, особено кога бев на мојата прва тету конвенција во Frankfurt. WOW Тоа беше будење, Не беше ништо како дома. Сега кога размислувам назад кон тие денови, јас сум толку благодарна што ги следев моите соништа и по некое чудо што мојот ментор ми даде шанса. Искрено, мислам дека најтешкиот дел од моето чиракување, од моите почетни денови, беше надминување на анксиозноста и имањето повеќе доверба во себе. Во оваа индустрија, постојано си околу луѓе и секогаш ги собираш нивните енергии. Огромна благодарност му должам на мојот ментор кој ме ослободи од мојата анксиозност. А и навистина не ми даде многу на избор. Ме оставаше да се грижам и да разговарам со муштериите дури и ако јас се тресев и пелтечев. Ме натера да си помогнам сама себе си да се буткам секој ден да биде подобро. Тој ме туркаше да бидам посигурна знаеше за што сум способна,знаеше дека сум неоткриена за многу нешта. Знаеше дека оваа девојка во мене само чека да излезе, се разбира многу ми е мило што тој го стори тоа. Имаше моменти кога навистина не беше воопшто интересно и беше многу напорно, но јас не би сакала ништо ни да променам. Во тие моменти тој секогаш ми кажуваше да знам дека тоа “смрди” сега, и ќе бидеш уморна и ментално и физички, но на крајот, сето тоа вреди. Ние сме во индустрија која не ја работат многу луѓе иако сега веќе многу нешта се искомерцијализираа . Ние им помагаме на луѓето да ја променат перцепцијата за себе по свое лично убедување,да се украсат по нивен вкус и можам да кажам дека тоа е доволна награда кога ќе ги видиш нивните задоволни насмеани лица откако си завршил.
2. Што е потребно за да се стане Пирсинг Артист и каква обука помина ти за да станеш Пирсинг артист?
Напрво треба да се најде добро професионално студио кое ќе те прими,без разлика прво и да си обичен продавач на накит само да ти се дозволи таква шанса,после е лесно.Кај нас нема многу професионални студија што работат на тој принцип – се знае кај нас како се учи пирсање – идеш у аптека купуваш игла и бушиш лево десно додека не ти успее 🙂 Но јас несакав така! Самото студио те упатува на обука во Црвен крст за прва помош и исто така на обука за кожни, патогени болести кои настануваат со самото продирање на кожата со игла.Откако ќе пројдеш година дена учиш/чиракуваш 🙂 како се стерилизира, како се дезинфицира, што значи стерилизација, чистење, педантност и внимателност, па зошто е сето тоа потребно – што е вкрстена-контаминација како уште многу здравствени и сигурносни процедури кои треба да ги знае секој пирсер е тогаш, дури, тогаш може да земеш игла и да боцкаш и украсуваш. Секоја нова процедура се прави постепено додека не се научи и се оди на следната која секогаш е на почетокот со супервизија (надгледување) од менторот. Мора да се научи односот клиент/пирсер, и како да му се објасни се – да не е нервозен и да се спреми за боцкање, па до крај за нега и чување на испирсаното место. Исто така мора да се научи разликата измеѓу материјалите на пирсовите. На крајот после се тоа најважно од се е да се посети неколку дневен семинар од познати светски пирсери кои можат многу да те научат и од нивното големо искуство да споделат уште ред два од тоа што си научил до тој момент.
3.Колку време работиш во Студиото и дали работиш нешто друго освен пирсање во студиото?
Како што веќе кажав претходно во СКИН АРТ студиото сум нешто повеќе од 10 години. Почнав во ова студио тука и останувам до крај, почнав како продавач во самиот процес на учење како да станам пирсинг артист научив како и да го менаџирам самото студио така да денес можам да се пофалам дека не само сум Пирсинг артист туку и менаџер на сето она што го гледате како се случува со СКИН АРТ студиото!
4.Зошто АПТПА – што е твојот придонес во здружението?
Секој некој кој се вложува самиот себе си за нешто повеќе да даде и да направи од самиот себе му треба да е член на некое Здружение. АПТПА нуди неверојатно многу можности и е единствена граѓанска организација од овој вид во Македонија.
Јас покрај тоа што сум менаџер и пирсинг артист завршив и Правен факултет на Универзитетот Св.Кирил и Методија во Скопје. А да и мајка сум на три прекрасни дечиња но тоа некогаш во друго интервју 🙂
Со здружението на граѓани активна сум во сите сегменти бидејки правото го учев пред се од аспект дека преку вакви здруженија можеме да помагаме на развивање на културата на самото општество – здружението помага на сите новопечени артисти во пирсањето и тетовирањето за едукација,ги упатува своите членови кои се заинтересирани на Семинари во Европа и исто така во Америка – сепак чест е да ја застапуваш својата земја во светот,посебно помеѓу прекрасни артисти кои се занимаваат со тетовирање и пирсинг.
5.Конвенции – колку ги следиш и посетуваш,што е според тебе интересно на конвенциите или ги посетуваш чисто професионално поради едукативни причини?
Конвенциите се пак сосема друга приказна. Треба да се посетуваат, моја препорака е ако не можеш да учествуваш на некоја таква голема позната конвенција каде има над 200-300 познати артисти од светот на тетовирањето и пирсингот тогаш барем посети ја како гостин. Верувајте многу се учи од тие конвенции, дружбата е голема и за овие наши мали простори тоа значи прекрасно ново искуство.
6.Пак ке прашам само пирсаш или планираш и чекор понатака во слични уметнички потфати(суспензија,скарификација,импланти и др.)
Како што напоменав пирсањето ми е во крвта хахахах многу сум амбициозна и љубопитна и секогаш ме интересираат новитетите кои ги нуди оваа индустрија. Една од тие се боди модификација, скарификацијата и суспензиите но полека полека,сакам прво да пробам на себе за да знам дали ке ме интересира да се занимавам со овие додатни уметнички потфати 🙂
7.Има ли стилови во пирсањето и ако има кој е твојот омилен стил на пирсање?
Стилови, хм неможе да кажам дека има одредени некои стилови всушност секој си има свој стил на работа, едноставно пирсинг артистите или работат како што се научиле со алатот да работат или па некои следат традиција на работа без алат пирсајки со слободна рака и рачно изработен материјал како што тоа го прават сеуште за жал уште многу малку племиња во светот. Јас ке си кажам дека изработувам се за што сум се научила дека постои како место каде што може да се пирса. Значи имаме пирсање на уво, пирсање на усни, пирсање на јазик, пирсање на гениталии, срфејс пирсинг и секој вид си има свој под вид, хахахаха значи многу многу опции….. Скоро секоја површина од телото може да биде испирсана се зависи што сакаш, лично јас многу сакам пирсови на усни и уво а најомилените ми се гениталните пирсови кои служат како и естетско така и за еротско задоволство.
8.Кои луѓе се пирсаат во Македонија !
Во Македонија едно време се пирсаа бунтовниците, оние кои сакаа да им пркосат на моралните норми и едноумието кое владееше, после тоа почнаа да се пирсаат особено на папок помодарите за на крај да се пирсаат или трендсетерките или па оние кои уживаат во самиот чин пирсање. Всушност сега веќе не е во прашање мода него само лична желба да бидеш испирсан и задоволството кое го добиваш од самиот чин и носењето на пирсот.
9.Што ке им препорачаш на луѓето кои се пирсаат кај нас?
Мислам дека најголемиот предизвик за мене, особено овде во Македонија, е да се биде трпелив со луѓето кога тие го прават токму спротивното од она што јас сум им го препорачала, за потоа да ме прашуваат како да се поправи она што тие го збркале. Тоа е малку фрустрирачки понекогаш, но доволно ми е да се потсетам дека тие не живеат од ден во ден во овој свет на пирсинг и тетоважи и дека всушност тие намерно и не ме игнорираат. Најискрено има многу конфликтни и застарени информации на интернет, а да не зборуваме за “пријатели” кои имаат веќе еден пирсинг и мислат дека тоа ги прави експерти. Всушност тука доаѓа до израз мојата работа за да им помогнам да се движите низ сите тие информации и всушност да ми веруваат мене нивниот пирсинг артист!
А најважната порака е – Едуцирај се себе си, разгледај испитај распрашај се, за да може да ја донесеш најдобрата најисправната одлука и да добиеш хигиенски, медицински успешен пирсинг, бидејќи не сите пирсери се компетентни и совесни!
10.Те има доста активно во дружба со едни од попопуларните тату и пирсинг модели – се дружиш или и ти си дел од бандата?
Како што веќе напоменав конвенциите се пред се за дружба и запознавање на нови луѓе и стекнување на нови искуства така и јас секоја моја посетена конвенција ја користам за дружба. За повеке некоја друга прилика, ке се види па ке правиме муабет 🙂
11. Заврши го интервуто со твои зборови,кажи ни нешто интересно за крај
Јас, навистина уживам во погледот на нечие лице и изразот кој го има, кога тој/таа ќе го види новиот пирсинг за прв пат. Нема ништо така убаво и исполнувачко како чувство кога ќе направиш некој друг да е толку неверојатно среќен! Никој не е совршен, ниту па има перфектно тело, но кога си истетовиран и испирсан си го украсуваш на свој сопствен начин и тогаш си најубав самиот за себе си а после и за сите други!!!
